АҚЫН ТОЙЫНА ҮЛЕС ҚОСТЫ

Аз ғана ғұмырында қазақ әдебиетіне керемет дүние қалдырған классик ақын Қасым Аманжоловтың 100 жылдық мерейлі мерекесі өзінің туған жері Қарқаралыда Кент тауының баурайында дүркіреп өтті. Шәйірдің ұлы тойына ел қалаулылары мен түбі бір түркі халықтарының, атап айтқанда Әзірбайжаннан, Башқұртстаннан, Түркиядан, Өзбекстаннан, Иран елі мен Татарстаннан қадірлі меймандар болды. Қарағанды қаласында ақынның алты метрлік мүсіні тұғырға қонды.

Кент тауында дауыл ақынның аруағына арнап ас берілді. Бұл игі шараға қала әкімі Б.Шыңғысов бастаған сәтбаевтықтар да атсалысып қайтты. Ақынның торқалы тойының қалай өткендігін, ондағы кеншілер қаласының қосқан үлесінің қаншалықты болғанын қалалық мәдениет және тілдерді дамыту бөлімінің басшысы Гүлсім ЕСМҰРЗАЕВАДАН білген едік:

– Осы тойды өткізуге байланысты облыс әкімі С.Ахметовтың берген тапсырмаларын орындау мақсатында дайындық жұмыстары қала басшысы Б.Шыңғысовтың басқаруымен орындалды. Қала әкімінің орынбасары Қ.Шайжанов Қарқаралы ауылына алдын-ала барып, ұйымдастыру жұмыстары мен іс-шаралардың өтуін біліп қайтты. Бұл тойға біздің қаладан жасауымен 5 киіз үй тігіліп, қонақтарға ас мәзірі дайындалды. Қаламыздан бұл тойға жүзге жуық адам атсалысты. Шығыс Жезқазған кеніші, материалдық-техникалық жабдықтау кәсіпорыны, жөндеумонтаждау құрылыс алаңы, «Сәт-Сәулет» АҚ, қала кәсіпкерлері мен білім, денешынықтыру және спорт, мәдениет және тілдерді дамыту, жұмыспен қамту және әлеуметтік бағдарламалар, ауылшаруашылығы бөлімдері мерейтойдың өтуіне белсенді түрде атсалысты.

– Дүбірлі тойда біздің көркемөнерпаздардың да өнері бағаланып қайтқан екен. Осыған тоқталсаңыз.

– Сәтбаевтық өнерпаздар өнердің майын ішкен майталман жұлдыздармен бірге үлкен сахнада өнер көрсетіп, көрермендер ілтипатына ие болды. Өлеңі өрттей болып қаулаған ақын тойының аясында Қарағанды облысының тілдерді дамыту жөніндегі басқармасы мектеп оқушылары арасында «Қасым оқуларын» өткізді. Қасым оқуларының барлық тапсырмаларын ережеге сай орындап шыққан Сәкен Сейфуллин атындағы гимназияның оқушысы Жанат Бейбіт І орынды иеленіп, дипломды және бағалы сыйлықты қанжығалап қайтты. Жанаттың жүлделі болуына көп көмегі тиген ұстазы, ақын Аман Бұқарға алғысымыз мол.

Кент тауының баурайында өткен дүбірлі тойда сөз сөйлеген облыс басшысы С.Ахметов тойға белсене қатысқан барлық ұжымдарға алғысын айтты. Қала әкімі Б.Шыңғысов та тойда бір жағадан бас, бір жеңнен қол шығарып, ұйымшылдық көрсеткен барлық сәтбаевтықтарға ризашылығын білдірді.

Республикалық көлемде өткен Қасым ақынның тойында Сәтбаев қаласының мерейі үстем болып қайтқаны біз үшін үлкен қуаныш, мақтаныш. «Қасым оқуларында» он үш оқушының ішінен Жанаттың үздік атануы қала күніне сый болды.

Бір сөзбен айтқанда, ақын тойы Арқа төсін дүбірге бөлеп, оқылған өлең, айтылған ән Алаш жұртын бір серпілтті.

Бағдат ҚАЗКЕНОВ.

Комментарии закрыты.