ТАБЫСТЫ ТАСҚЫНДАТҚАНДАР

«Қазақмыс корпорациясы» ЖШС Оңтүстік Жезқазған кенішінде табысты тасқындатуға үлес қосқан еңбек бәсекесінің жеңімпаздары марапатталды.

Өз ісінің үздіктерін кеніштегі кәсіподақ төрағасы Абзал Жаңабергенов пен бас инженер Батырхан Қонарбаев құттықтады.

– Еңбекті ұйымдастырудың ең ұтымды жағы ұжымдағы береке-бірлікте. Сондықтан, қызметкерлер мен кеншілердің арасындағы байланысқа, олардың әлеуметтік жағдайына жете назар аударамыз. Әр адамның түр-тұлғасына ғана емес, жанына үңілеміз. Ұйымдастыру барысында жұмысқа деген қызығушылықты арттырып, алға жетелеу басты қағида. Қолдау танытып қана қоймаймыз, темірдей тәртіп талап етіледі. Тәртіп болған жерде қауіпсіздік шаралары күшейтіледі, жұмыс жүреді. Мұны қазір еңбек ұжымы жақсы түсініп, дамыта түсуде, – деген А.Жаңабергенов «КәсіпҚорған» кәсіподағының Құрмет грамотасы мен сыйақысын Ринат Ашимов, Ақмарал Жүнісова, Жандос Мыңбаев, Іляс Оспанов, Азамат Сақаев, Рысқұл Хасенов, Ардақ Далабаев, Нұрлан Омаров, Анна Абильдинова, Азамат Мейрамов, Құрмет Төлеубай, Үсен Кенчимов, Әсет Тайгуленов, Мұса Жолдасбеков, Андрей Нажмудинов, Линас Грицюнас, Ерлан Ережепов, Сәкен Ержановқа табыстады.

Кәсіпорында еңбек жарысын жиі ұйымдастыру жолға қойылған. Тоқсан сайын учаскелер арасында өтетін шараның қорытындысы жыл аяғында шығарылып, баға беріледі. Мақсат – жоспарды орындау, қауіпсіздік техникасын жетілдіріп, маңызын арттыра түсу. Осы тектес жобалар арқылы жұмысшыларды бір мақсатқа жұмылдыру күн тәртібіндегі негізгі мәселенің бірі.

– Тәжірибе жағы біртіндеп жиналатындықтан апатсыз жұмыс істеу үшін қауіпсіздік техникасын жетік біліп қана қоймай, мүлтіксіз орындау шарт. Сонда берілген жоспар да жүзеге асырылады. Қауіпсіздік техникасы шаралары бойынша жұмыс жоспары құрылып, «Өмір» жобасы енгізілген. Нәтижесі де айтарлықтай. Жауапкершілік арта түсті. Аталған жетістіктер ұжымның бірлікте еңбек етуінің, әр адамның өз кәсібін жетік меңгеруінің арқасында жүзеге асырылуда. Бұл бағытта еңбек ұжымының үлесі зор, – дейді ырғақты жұмыс істеп, тапсырманы тиянақты орындап жүрген А.Мейрамов.

Мейрамгүл Шахат.
Сурет автордікі.

Комментарии закрыты.