Кəсіби мерекелердің қатары толықты

Біріккен ұлттар ұйымының шешімі бойынша 23 маусым – мемлекеттік қызмет күні деп бекітілді. Бүгінгі таңда қаламызда 82 мемлекеттік қызметкер бар. Осы қызметкерлерді алғашқы кəсіби мерекелерімен құттықтау мақсатында қала басшысы Батырлан Ахметовтың қатысуымен салтанатты жиын өтті.

Жиналғандарды Батырлан Дүйсенбайұлы құттықтады. Қызметкерлердің қатарын тағы бір топ жас мамандар толықтырды. Құрылыс, сəулет жəне қала құрылысы бөлімінің бас маманы Наурызбек Жайлаубаев, азаматтық қорғаныс жəне төтенше жағдайлар жөніндегі топтың аға инспекторы Ғани Қасымов, Жезқазған кенті əкім аппаратының бас маманы Ольга Огриневич, тұрғын-үй коммуналдық шаруашылығы, жолаушылар көлігі жəне автокөлік жолдары бөлімінің бастығы Серік Оразбаев Қазақстан Республикасының заңнамаларын сақтауға, ел игілігі жолында қызмет жасайтындықтарына ант берді. Қала басшысы Б.Ахметов қызметке тағайындалған мамандарға қызметтік куəлік тапсырып, сəттілік тіледі.

Бірінші рет аталып өтіп отырған бұл мерекеде мемлекеттік қызметте еңбек еткен Сабыр Омаров, Гүлсім Есмұрзаева, Галина Егорова, Любовь Тислимова, Галина Беланова сынды зейнеткерлерге құрмет көрсетілді. Зейнеткерлер атынан Галина Беланова сөз алып, кейінгі жас мамандар елдің дамуына, Елбасының сындарлы саясатын жүзеге асыру жолында еңбек ете берсін деген тілегін жеткізді.

Қаланың қоғамдық-саяси өміріне жəне жаңа қазақстандық қоғам құрудағы үлестері бар тұрғын-үй коммуналдық шаруашылығы, жолаушылар көлігі жəне автокөлік жолдары бөлімінің бас маманы Кенжетай Кенжина, қалалық мəслихаттың бас маманы Динара Құлашева, əкім аппаратының қаржы-шаруашылығы бөлімінің бас маманы Қарлығаш Любенчук, кəсіпкерлік бөлімнің бастығы Зəуреш Таянова мен жұмыспен қамту жəне əлеуметтік бағдарламалар бөлімінің бас маманы Сатыбалды Тезекбаева қала əкімінің Құрмет грамотасымен марапатталды.

Бағдат ҚАЗКЕНОВ.

Комментарии закрыты.