Дәстүр және заң

Бүгінгідей күрделі кезеңде халық болып кеңесіп, жұрт болып бәтуаласатын келелі мәселелер аз емес. ҚР Мемлекеттік хатшысы Қырымбек Көшербаев ғұрыптық рәсімдерді заңмен реттеумен айналысатын жұмыс тобын құруды ұсынды, деп хабарлады inform.kz.

«Біздің қоғамымыз жаңарған соң ұстанатын салт-дәстүрлеріміз де өзгеруге тиіс. Елді кері тартатын жағымсыз қасиеттерден тездетіп арылуымыз керек. Мысалы, қазақтың тойы есепсіз шығынның емес, шынайы шаттықтың көрінісіне айналуы тиіс. Барымызды шашып-төгіп, қарызданып той мен басқа жиын өткізетін әдеттен арылуымыз қажет. Ысырапшылдық пен даңғазалық қоғамның да, адамның да абыройын төгеді. Сондықтан, кейбір мәселелерді заңды жолмен реттеудің кезі келді деп ойлаймын. Ал, жауапсыздық пен немқұрайлылық бүкіл елді қасіретке ұшыратады», – деді Қ.Көшербаев.
Мемлекеттік хатшы бекітілген санитарлық талаптарды бұзып, жасырын той жасап, құдалық өткізіп, ас беріп жатқан оқиғалардың арты орны толмас өкінішке әкеп соқтыратындығын жеткізді.
«Көрші елдерде мына дүниеден ана дүниеге дейінгі орындалатын салт-дәстүр, (той, ас, жаназа т.б) әдет-ғұрып рәсімдерін заңмен реттеп қойғандықтан, қойылған талапты қалыпты түрде қабылдайды. Біз не істеуіміз керек? Алдағы уақытта көпшілікпен кеңесе келе, біз де көрші елдердің үлгісі бойынша ғұрыптық рәсімдерді заңмен реттеу шараларын қолға алуымыз керек. Сондықтан, дүниежүзілік пандемия тұсында және одан кейінгі кезеңде ғұрыптық рәсімдерді заңмен реттеу шаралары бойынша зиялы қауым мен қоғам қайраткерлері, осы саламен айналысатын заңгерлерден құралған жұмыс тобын құруды ұсынамын», – деді ол. Алдағы уақытта бұл топ көрші елдердің тәжірибесін зерттеп, халықтың ой-пікірін зерделеп және қажет болған жағдайда тиісті нормативтік-құқықтық актінің жобасын әзірлеумен айналысатын болады.

Алтынгүл ТӨЛЕГЕНОВА.

Комментарии закрыты.