«Ағалар жолын жалғастыруға дайынбыз»

Кен өндірісінің алып шаһары – Сәтбаев қаласының 40 жылдығы қарсаңында «Нұр Отан» ХДП Сәтбаев қалалық филиалы жанындағы «Жас Отан» Жастар қанатының ұйымдастыруымен аға буын мен жастардың кездесуі өтті.

04-1-1

Жастармен өткен ақ­жар­қын жүздесуге қала басшысы Әнуар Омар, қаланың Құрметті азаматы Мұзараф Аханов, Социалистік еңбек ері Демберген Баймағанбетов, сондай-ақ, қаланың даму жолында аға буынның ізін жалғастырып келе жатқан қалалық білім, денешынықтыру және спорт бөлімінің басшысы Шынар Жанасылова, мемлекеттік қызмет саласының ардагері Гүлсім Есмұрзаева, 1996-98 жылдары қала әкі­мінің орынбасары болған Татьяна Хмилярчук, 1999-2003 жылдары қалалық мәдениет бөліміне басшылық жа­­саған Нина Геймбух, 1999-2008 жылдары «Нұр Отан» ХДП Сәтбаев қа­лалық филиалы төр­аға­сының бірінші орын­басары қызметін ат­қарған Айгүл Төлендина, спорт­тық-сауықтыру кеше­нінің директоры Юрий Апарин қатысып, ашық әңгіме өрбітті.

Кездесудің әлқиссасын Әнуар Серікбайұлы өзі бастап, қаланың кешегісі мен бүгінгісін және болашақтағы бағдарын тілге тиек етті.

– Арқаның төсінде жері ырысқа толы құтты мекен аз емес. Соның бірі – кен­ші­лердің шаһары – осы Сәт­баев қаласы. Ағалар ең­бе­гінің нәтижесінде дү­ниеге кел­ген қаламыздың даму­ында, өркендеуінде сол аға­ла­рымыздың еш нәрсемен өлшенбейтін еңбегі жатыр. Ең әуелі біз ұлы академик Қ.И.Сәтбаевтың зор үлесі үшін қарыздармыз. Қырық жыл, тарих таразысына салып есептесек, аз да, көп те емес. Осы жылдар ішінде бұл қаланың дамуы оңай болды деп айтуға мүлде келмейді. Қаланың кешегі даму тарихында алдарыңызда отыр­­­ған Мұзекеңдердің, Де­мекеңдердің ізі сайрап жатыр. Біз сол кісілерден үлгі алсақ, сіздер олардың ерлігін мақтаныш тұтуларыңыз керек.

Қырық белестің қырқасына шыққан қаламыздың бола­ша­­ғына мен сенемін. Жалын­даған жастары бар кенді қаланың болашағы жарқын. Қазіргі күні қаланы дамытудың бірнеше бағдарламасы қолға алынып, жүзеге асырылуда. Келешекке ұмтылыс жасауға бізде барлық мүмкіншіліктер бар. Соны тиімді пайдалана білуіміз қажет, – деді қала басшысы.

Залға жиналған жастар­дың басым көпшілігі Әнуар Серікбайұлына сұ­рақ­­тарын жолдап жатты. Соның қатарында жастарды толғандырған мәселелер – қа­ла­ның болашағы, ұлттық салт-сананы өз қалпында қаймағын бұзбай сақтау, ұлттық рухты тереңдете түсу, жастар саясатын одан әрі ілгері бастыру сынды өзекті тақырыптар ортадан ойып тұрып орын алды. Әнуар Серікбайұлы жас­тар­дың осындай мәселе кө­те­ріп, оны талқылауға ұсын­ғандықтарына ризашы­­лығын білдіре келе, бұл мәселелер бойынша өзінің ой-пікірін жеткізе кетті.

– Сөзімнің басында айт­қандай, Сәтбаев қала­сының болашағы жарқын. Әрине, сарқылып, таусылмайтын дү­ние жоқ. Кен қорының бай өлшемі біздің жерімізде әлі күнге дейін толық игеріліп болған жоқ. Бұл «Қазақмыс» корпорациясы мамандарының пікірі. Алдағы жылдары кен қойнауларының көзін ашуға байланысты зерттеу жұмыстары жүргізілмек. Шағын қа­ла­ларды дамыту бағдарламасының аясында қазіргі таңда қала бойынша ауқымды жұмыстар жүргі­зілуде. Алдағы уақыт­­қа жоспарлап отырған ауқымды жұмыстар да баршылық. Сондықтан да қала­ның бола­шағы кемел. Ұлттық салт-сана, рухани байлық – мәңгілік мұралар. Оны тек өзінің қадір-қасиетімен ұстап қала алсақ қана құнды. Жастар өзіміздің ұлттық болмысымызға сай дүниелерден шындығы керек, алшақтады. Бірақ, біз ұлттық тәрбиені, салт-дәс­түрді жастардың бойына қайта сіңдіруге жұмыс жасауымыз қажет. Жасыратыны жоқ, қазіргі жастар ұлттық ән-күйдің қадір-қасиетін тү­сіну түгілі, тыңдаудан алшақ кетті. Қазіргі күні қалада дәстүрлі әндерді дәріп­тейтін мектеп ашу, мамандар даярлау ісін қолға алу жоспарлануда. Қайталап айтамын, мұның барлығына да жастардың ынта-жігері, ұлттық мәдениетке, ұлт­тық рухқа үн қосамын деген жастардың талпынысы керек, – деп ойын түйіндеді әкім.

Келесі кезекте қаланың Құрметті азаматы, 1982 жылдан 1985 жылға дейін Никольский қалалық атқару комитетінде төрағалық қызметте болған Мұза­раф Аханов сөз алып, қала тарихынан сыр шертті. Бүгінгі даму дең­гейіне тоқталып, келешегі жарқын боларына сенімін білдірді.

Қаламыздың дамуы мен өркендеуі жолында аянбай тер төккен кен өндірісінің озаты Демберген Баймағанбетов жастарды ең­бекте шыңдалуға шақырса, бүгінде қаламыздың әр саласында басшылық жасап жүрген өзге де кездесуге қатысушылар жастарды білімді, білікті әрі ұйымшыл болуға шақырды.

Кездесуден өздеріне тәлімді де тағылымды ой түйген жастар аға буынға алтын уақыттарын бөліп, ой-пікірлерін бөліскендері үшін ризашылықтарын білдіріп жатты.

Бағдат Қазкенов.

Сурет автордікі.

Комментарии закрыты.