Мүгедектер мәселесі қаралды

Қазан айының 10-ы Мүгедектер күні болып есептеледі. Қазақстанда барлық санаттағы мүгедектердің саны халықтың 3 %-ын құрайды екен.

Мүмкіндіктері шектеулі, кемтар жандардың проблемалары, олардың құқығын қорғау – күн тәртібінен түспейтін өзекті мәселе. Осығай орай, қала әкімінің орынбасары Марал Мәдиеваның төрағалық етуімен қалалық мүгедектер істері жөніндегі Кеңестің отырысы өтіп, күн тәртібінде екі мәселе қаралды.

«Мүгедектерді спорттық секцияларға тарту» сұрағы бойынша қалалық білім, денешынықтыру және спорт бөлімінің сектор меңгерушісі Қ.Тілегенов сөз алды.

– Бүгінгі күні қалада 3842 мүгедек бар. Оның 228-і І-топ мүгедегі. Балалармен спорттық шаралар жиі өткізіліп тұрады, дегенмен, тұрақты секциялар ашылса дұрыс болар еді. Әзірге олар «Мечта» аула клубында тек дойбымен ғана айналысады, – деді Қуат Тілегенұлы.

– Мүгедектермен жұмысты күнделікті ұйымдастыру керек, біз тек мереке кезінде ғана тартамыз. Кемтар балаларға бірігіп жағдай жасап, көп қимылдайтын спорттық ойындар өткізуіміз керек, – деп толықтырды Марал Сағынайқызы.

Күн тәртібіндегі «Мүгедектер күніне дайындық шаралары туралы» мәселеде қалалық жұмыспен қамту және әлеуметтік бағдарламалар бөлімінің бастығы Т.Қапарова хабарлама жасады.

– Қала бойынша бүгінде 46 жалғызілікті мүгедек адам көмегін қажет етеді. Олар ай сайын мемлекет тарапынан берілетін жәрдемақыға қосымша бағып-күту үшін облыстық бюджеттен қаржы алып отырады. Үйден оқып тәрбиеленетін 76 мүгедек балаға да ай сайын жәрдемақы төленеді. Жасы 16-ға дейінгі мүгедек балалар, мүгедектер, зейнетақысы төмен зейнеткерлер мен 4 және одан да көп кәмелетке толмаған баласы бар аналар қала ішіндегі көлікте тегін жүру билетін қолданады. Сондай-ақ, жүріп-тұруы қиын мүгедектер үшін арнайы жабдықталған көлік бар. Есеп беру мерзімінде 2200 адам жүру билетімен қамтамасыз етілген, оның 733-і мүгедектер.

Қарттар күні мен Мүгедектер күніне байланыста І-топтағы 255 мүгедекке 510,0 мың теңге материалдық көмек көрсетіледі. Ал, ІІ-ІІІ-топтағы 165 адамға азық-түлік түрінде көмек беріледі, – деді Талиға Ғабдолқызы.

Кеңес отырысын қорытындылай келе, М.Мәдиева кемтар жандарға деген қамқорлықты жандандыруға шақырды. Осы жұмыстарды ұйымдастыруды жан-жақты етуді, яғни, кейбір кісілердің шеттеп, тыс қалмауына көңіл бөлуді тапсырды. Сондай-ақ, бұл жұмысқа үкіметтік емес ұйымдарды да жұмылдырып, әлеуметтік тапсырыстар жасау керек деген ұсыныс берді.

Ғаріп жандардың бәрі бірдей өмірден түңіліп, жатып алмайды. Кейбір кедергілерден өршеленіп, тұрмыстың ауыртпалығын жеңіп шығатын рухы асқақтары да бар. Оған мысал, еліміздің параолимпиадалық құрамалары небір додаларда жеңіп шығуда. Қайсарлықтың, жігерінің арқасында ауруын жеңген сана-сезімі ояу спортшыларды естіп-көріп жүрміз. Олай болса, біздің қаламыздан да осындай спортшылардың шығуына жағдай жасайық.

М.Жаппасбаева.

Комментарии закрыты.